முன்னாள் இராஜாங்க அமைச்சர் சிவனேசதுரை சந்திரகாந்தன் எனப்படும் பிள்ளையான் மற்றும் இராணுவப் புலனாய்வுப் பிரிவின் தகவலாளர்கள் இருவர் உள்ளிட்ட மூவரையும் எதிர்வரும் நவம்பர் 23ஆம் திகதி வரை தொடர்ந்து விளக்கமறியலில் வைக்குமாறு மட்டக்களப்பு நீதவான் நீதிமன்றம் இன்று (10) உத்தரவிட்டுள்ளது.
2008ஆம் ஆண்டு மட்டக்களப்பு மாவட்டத்தில் T-56 ரக துப்பாக்கியைப் பயன்படுத்தி ஐவர் சுட்டுக்கொல்லப்பட்ட சம்பவங்கள் மற்றும் வர்த்தகர் ஒருவர் கடத்திப் படுகொலை செய்யப்பட்ட சம்பவம் தொடர்பான குற்றச்சாட்டுகளின் அடிப்படையில் இவர்கள் கைது செய்யப்பட்டுள்ளனர்.
கல்லடியில் காவல்துறை அதிகாரி ஒருவர் உள்ளிட்ட இருவர் சுட்டுக்கொல்லப்பட்ட சம்பவம், காத்தான்குடியில் தமிழ் மக்கள் விடுதலைப் புலிகள் (TMVP) கட்சியின் உறுப்பினர் ஒருவர் உள்ளிட்ட இருவர் சுட்டுக்கொல்லப்பட்ட சம்பவம் மற்றும் 2008ஆம் ஆண்டு வவுணதீவு – கரையக்கன்தீவு பகுதியில் வர்த்தகர் ஒருவர் கடத்திப் படுகொலை செய்யப்பட்ட சம்பவம் ஆகியவை தொடர்பில் விசாரணைகள் முன்னெடுக்கப்பட்டு வருகின்றன.
இந்நிலையில், பிள்ளையான் காணொளித் தொழில்நுட்பம் ஊடாக இன்று நீதிமன்றத்தில் முன்னிலைப்படுத்தப்பட்டார்.
அதேவேளை, விளக்கமறியலில் வைக்கப்பட்டுள்ள இராணுவப் புலனாய்வுப் பிரிவின் தகவலாளர்களான முகமது சிஃபான் மற்றும் முகமது சகீத் ஆகியோர் நீதிமன்றத்தில் நேரடியாக முன்னிலைப்படுத்தப்பட்டனர்.
மேலும், லண்டனில் தலைமறைவாக இருப்பதாகக் கூறப்படும் ‘பொலிஸ் ஃபைஸ்’ என அழைக்கப்படும் ரசிக் முகமது ஃபைஸ் என்பவருக்கு எதிராக ஏற்கனவே பிறப்பிக்கப்பட்ட பகிரங்க பிடியாணை தொடர்ந்து நடைமுறையில் இருக்கும் என்றும் நீதவான் உத்தரவிட்டுள்ளார்.
