தென்கிழக்கு வங்காள விரிகுடாவில் உருவாகவுள்ள வளிமண்டலத் தளம்பல், குறைந்த காற்றழுத்தப் பகுதியாகவும் பின்னர் காற்றழுத்தத் தாழ்வு மண்டலமாகவும் வலுப்பெறக்கூடும் என வளிமண்டலவியல் திணைக்களம் எதிர்வு கூறியுள்ளது.
இதன் காரணமாக, எதிர்வரும் நவம்பர் 15, 16 மற்றும் 17ஆம் திகதிகளில் இலங்கையின் பல பகுதிகளில் மழை வீழ்ச்சி அதிகரிக்கக்கூடும் என எதிர்பார்க்கப்படுகிறது.
குறிப்பாக, வடக்கு, வடமத்திய மற்றும் கிழக்கு மாகாணங்களில் அதிக மழை பெய்யக்கூடும் என எதிர்வுகூறப்பட்டுள்ளது.
மேலும், மேல், சபரகமுவ, மத்திய மற்றும் ஊவா மாகாணங்களிலும் காலி, மாத்தறை மாவட்டங்களின் சில இடங்களிலும் 100 மில்லிமீற்றருக்கும் அதிகமான பலத்த மழை பெய்யக்கூடும் எனத் தெரிவிக்கப்பட்டுள்ளது.
அதேவேளை, குறித்த காற்றழுத்தத் தாழ்வு மண்டலம் இலங்கையின் கிழக்குக் கரையோரமாக வடக்கு நோக்கி நகரும் பட்சத்தில், நாட்டுக்குக் கடுமையான பாதிப்புகள் ஏற்படக்கூடும் என வளிமண்டலவியல் திணைக்களம் எச்சரித்துள்ளது.
இதற்கிடையில், இடியுடன் கூடிய மழை பெய்யும் சந்தர்ப்பங்களில் மின்னல் தாக்கங்கள் மற்றும் தற்காலிகமாக வீசக்கூடிய பலத்த காற்று தொடர்பில் பொதுமக்கள் மிகுந்த அவதானத்துடன் செயற்படுமாறும், தேவையான முன்னெச்சரிக்கை நடவடிக்கைகளை மேற்கொள்ளுமாறும் அறிவுறுத்தப்பட்டுள்ளனர்.
எனவே, எதிர்வரும் நாட்களில் வானிலை தொடர்பான உத்தியோகபூர்வ அறிவிப்புகளைத் தொடர்ந்து அவதானிக்குமாறு பொதுமக்கள் கேட்டுக்கொள்ளப்படுகின்றனர்.
