இலங்கைக்கு அருகில் நிலவிய குறைந்த அழுத்தப் பிரதேசம் மேற்கு திசையை நோக்கி நகர்ந்து நாட்டிலிருந்து விலகிச் சென்றுள்ள போதிலும், அதன் தாக்கம் தொடர்ந்து காணப்படுவதால் இன்று (23) நாட்டின் பல பகுதிகளில் 75 மில்லிமீற்றருக்கும் அதிகமான பலத்த மழை பெய்யக்கூடும் என வளிமண்டலவியல் திணைக்களம் அறிவித்துள்ளது.
மேல், சபரகமுவ, மத்திய, வடமேல் மற்றும் வடக்கு மாகாணங்களிலும் அநுராதபுரம் மற்றும் காலி மாவட்டங்களிலும் அவ்வப்போது மழை அல்லது இடியுடன் கூடிய மழை பெய்யக்கூடும்.
நாட்டின் ஏனைய பகுதிகளில் பிற்பகல் 1.00 மணிக்குப் பின்னர் மழை அல்லது இடியுடன் கூடிய மழை பெய்யக்கூடும் என எதிர்பார்க்கப்படுகிறது. சில இடங்களில் 75 மில்லிமீற்றருக்கும் அதிகமான பலத்த மழை பெய்ய வாய்ப்புள்ளதாகவும் தெரிவிக்கப்பட்டுள்ளது.
இதற்கிடையில், மத்திய மற்றும் ஊவா மாகாணங்களின் சில இடங்களில் காலை வேளையில் லேசான பனிமூட்டம் காணப்படக்கூடும். இடியுடன் கூடிய மழை பெய்யும் சந்தர்ப்பங்களில் தற்காலிகமாகப் பலத்த காற்றும் வீசக்கூடும் என எச்சரிக்கப்பட்டுள்ளது.
பயணிகளுக்கு எச்சரிக்கை
மின்னல் தாக்கம் மற்றும் மண்சரிவு அபாயங்கள் நிலவுவதால், குறிப்பாக பதுளை, கண்டி, கேகாலை, குருநாகல், நுவரெலியா மற்றும் இரத்தினபுரி மாவட்டங்களில் பயணிப்போர் மிகுந்த அவதானத்துடன் செயற்படுமாறு அனர்த்த முகாமைத்துவ மையம் (DMC) கேட்டுக்கொண்டுள்ளது.
மேலும், மத்திய மலைநாடு உள்ளிட்ட அபாயம் நிலவும் பகுதிகளுக்கான தேவையற்ற பயணங்களைத் தவிர்க்குமாறும் பொதுமக்களுக்கு அறிவுறுத்தப்பட்டுள்ளது.
அவசர உதவிகள் தேவைப்படுவோர் அனர்த்த முகாமைத்துவ மையத்தின் 117 என்ற அவசர தொலைபேசி இலக்கத்துடன் தொடர்புகொள்ளுமாறும் அறிவிக்கப்பட்டுள்ளது.
