அமெரிக்க ஜனாதிபதி டொனால்ட் ட்ரம்ப், ஈரானுடனான பேச்சுவார்த்தைகள் முன்னேற்றம் கண்டால் மீண்டும் தாக்குதல் நடத்த வேண்டிய அவசியம் ஏற்படாது எனத் தெரிவித்ததைத் தொடர்ந்து, சர்வதேச சந்தையில் மசகு எண்ணெய் விலைகள் கடுமையாக வீழ்ச்சியடைந்துள்ளன.
இதன்படி, பிரெண்ட் (Brent) ரக மசகு எண்ணெயின் விலை 5.85 சதவீதத்தால் குறைந்து, ஒரு பீப்பாய் 92.57 அமெரிக்க டொலராகப் பதிவாகியுள்ளது. பின்னர் அதன் விலை மேலும் 7 டொலருக்கும் அதிகமாகச் சரிவடைந்துள்ளது.
அதேவேளை, அமெரிக்காவின் WTI ரக மசகு எண்ணெயின் விலை 4.38 சதவீதத்தால் குறைந்து, ஒரு பீப்பாய் 86.85 டொலராகப் பதிவாகியுள்ளது.
கடந்த வாரமும் பிரெண்ட் ரக மசகு எண்ணெயின் விலை 16 சதவீதத்தால் வீழ்ச்சியடைந்திருந்தது. கொவிட்-19 தொற்றுநோய் ஆரம்பித்த காலத்திற்குப் பின்னர் பதிவான மிகப்பெரிய வாராந்த விலை வீழ்ச்சியாக இது குறிப்பிடப்படுகிறது.
எனினும், ஹோர்முஸ் நீரிணைக்கு அருகில் கப்பல்கள் மீதான தாக்குதல்கள் மற்றும் சவுதி அரேபியாவின் எண்ணெய் உட்கட்டமைப்புகள் மீதான அச்சுறுத்தல்கள் காரணமாக, மத்திய கிழக்குப் பிராந்தியத்தில் பாதுகாப்பு அபாயங்கள் தொடர்ந்து நீடித்து வருகின்றன.
இதற்கிடையில், அமெரிக்காவுடன் பேச்சுவார்த்தைகளை முன்னெடுப்பதற்கு முன்னர் ஏழு நிபந்தனைகளை நிறைவேற்ற வேண்டும் என ஈரான் வலியுறுத்தியுள்ளதாகத் தெரிவிக்கப்படுகிறது.
மேலும், உலக சந்தையில் எண்ணெய் விநியோகம் அதிகரித்து வருவதுடன், விலை உயர்வு காரணமாக எண்ணெய்க்கான தேவை குறைவடைந்துள்ளமையும் தற்போதைய விலை வீழ்ச்சிக்கு முக்கிய காரணங்களாகக் குறிப்பிடப்படுகின்றன.
அமெரிக்கா – ஈரான் இடையிலான பதற்றம் தணியக்கூடும் என்ற எதிர்பார்ப்பும், சர்வதேச சந்தையில் எண்ணெய் விநியோகம் அதிகரிப்பும் மசகு எண்ணெய் விலைகளில் சரிவை ஏற்படுத்தியுள்ளதாகச் சுட்டிக்காட்டப்படுகிறது.
