இலங்கையின் கல்வித்துறையில் 21-ஆம் நூற்றாண்டின் சவால்களை எதிர்கொள்ளும் வகையில், ஐந்து பிரதான தூண்களை அடிப்படையாகக் கொண்டு பாரிய சீர்திருத்தங்கள் முன்னெடுக்கப்படவுள்ளதாக சுகாதார மற்றும் ஊடகத்துறை அமைச்சர் வைத்தியர் நளிந்த ஜயதிஸ்ஸ தெரிவித்துள்ளார்.
ஆண்டுவாரியான சீர்திருத்தத் திட்டம்
கல்விச் சீர்திருத்தத்திற்கான தேசிய இயக்கத்தின் இரத்தினபுரி மாவட்ட நிகழ்வில் உரையாற்றிய அமைச்சர், அடுத்த சில ஆண்டுகளில் பாடத்திட்டங்கள் மாற்றியமைக்கப்படவுள்ள கால அட்டவணையை வெளியிட்டார்.
2026 (இந்த ஆண்டு): தரம் 1 மற்றும் தரம் 6 ஆகியவற்றுக்கான சீர்திருத்தங்கள் (தரம் 6 மட்டும் அடுத்த ஆண்டு வரை ஒத்திவைக்கப்பட்டுள்ளது).
2027 ஆம் ஆண்டு: தரம் 2 மற்றும் தரம் 7 ஆகியவற்றுக்கான மாற்றங்கள்.
2028 ஆம் ஆண்டு: தரம் 3 மற்றும் தரம் 8 ஆகியவற்றுக்கான மாற்றங்கள்.
2029 ஆம் ஆண்டு: தரம் 4 மற்றும் தரம் 9 ஆகியவற்றுக்கான பாடத்திட்ட மறுசீரமைப்பு.
இந்தச் சீர்திருத்தங்களுக்குத் தேவையான நவீன பாடத்திட்டங்களை உருவாக்குவதில் கல்வித்துறை சார்ந்த நிபுணர்கள் தீவிரமாக ஈடுபட்டு வருகின்றனர். முதலாம் தரத்திற்கான ஆரம்பக்கட்டப் பணிகள் ஏற்கனவே தொடங்கப்பட்டுள்ளதாக அமைச்சர் சுட்டிக்காட்டினார்.
“வெறும் ஏட்டுக்கல்வியுடன் நின்றுவிடாமல், உலகளாவிய சவால்களை எதிர்கொள்ளக்கூடிய திறன்மிக்க பிரஜைகளை உருவாக்குவதே இந்த 5 தூண்கள் அடிப்படையிலான சீர்திருத்தங்களின் பிரதான நோக்கமாகும்,” என அமைச்சர் ஜயதிஸ்ஸ வலியுறுத்தினார்.
