எப்ஸ்டீன் ரகசியக் கோப்புகளில் இலங்கை : 182 இடங்களில் குறிப்பு – பின்னணி என்ன?

அமெரிக்காவில் சிறுவர் துஷ்பிரயோகக் குற்றச்சாட்டுகளுக்கு உள்ளான மறைந்த கோடீஸ்வரர் ஜெப்ரி எப்ஸ்டீன் (Jeffrey Epstein) தொடர்பான புதிய ஆவணத் தொகுப்பு அந்நாட்டு நீதித் திணைக்களத்தினால் வெளியிடப்பட்டுள்ளது.

இதில் இலங்கை பற்றிய தகவல்கள் 182 இடங்களில் இடம்பெற்றுள்ளமை பெரும் பரபரப்பை ஏற்படுத்தியுள்ளது.

3 மில்லியன் பக்கங்கள்; 2,000 வீடியோக்கள்

கடந்த ஜனவரி 30 ஆம் திகதி வெளியிடப்பட்ட “எப்ஸ்டீன் கோப்புகள்” (Epstein Files) என அழைக்கப்படும் இந்த புதிய ஆவணத் தொகுப்பில், 3 மில்லியன் பக்கங்கள், 1.8 லட்சம் புகைப்படங்கள் மற்றும் 2,000 வீடியோக்கள் அடங்கியுள்ளன.

இதில் ரிச்சர்ட் பிரான்சன், பில் கேட்ஸ், எலான் மஸ்க் போன்ற உலகப் புகழ்பெற்ற நபர்களின் பெயர்களும் இடம்பெற்றுள்ளன. இருப்பினும், பெயர்கள் இடம்பெற்றுள்ளமையால் மட்டும் அவர்கள் தவறு செய்தவர்கள் என்று அர்த்தப்படாது என அறிக்கையில் சுட்டிக்காட்டப்பட்டுள்ளது.

இலங்கையின் கட்டடக்கலை மீது ஆர்வம்

இலங்கை பற்றி 182 இடங்களில் குறிப்பிடப்பட்டிருந்தாலும், எப்ஸ்டீன் இலங்கையில் எந்தவொரு குற்றச் செயல்களிலும் ஈடுபட்டதாக அந்த ஆவணங்களில் கூறப்படவில்லை.

மாறாக, அவரது ரகசியத் தீவான ‘லிட்டில் செய்ன்ட் ஜேம்ஸ்’ (Little St. James) கட்டுமானத்தில் இலங்கையின் உலகப் புகழ்பெற்ற கட்டடக்கலைஞர் ஜெப்ரி பாவாவின் (Geoffrey Bawa) தனித்துவமான வடிவமைப்புப் பாணியைப் பயன்படுத்த அவர் முயற்சித்ததாகத் தெரியவந்துள்ளது.

முக்கிய அம்சம்: இயற்கைக்கும் கட்டிடங்களுக்கும் இடையிலான அபூர்வ இணைப்பை ஏற்படுத்தும் பாவாவின் பாணியைத் தனது தீவில் மீள் உருவாக்கம் செய்வது குறித்து எப்ஸ்டீன் நீண்ட கலந்துரையாடல்களை நடத்தியுள்ளார்.

ஜூலியன் லீஸ் – எப்ஸ்டீன் தொடர்பு

எப்ஸ்டீனின் நெருங்கிய சகாவான ஜூலியன் லீஸ் என்பவரால், ஜெப்ரி பாவாவின் கட்டிட வடிவமைப்பு புகைப்படங்கள் அடங்கிய மின்னஞ்சல்கள் எப்ஸ்டீனுக்கு அனுப்பப்பட்டுள்ளன.

ஜூலியன் லீஸ், 80-90களில் புகழ்பெற்ற பிரித்தானிய ஆயுத வியாபாரி டக்ளஸ் லீஸின் புதல்வர் ஆவார்.

இவர் நீண்டகாலமாக இலங்கையைத் தனது வசிப்பிடமாகக் கொண்டிருந்தார் என்பதும், எப்ஸ்டீனுடன் நெருக்கமான வர்த்தகத் தொடர்புகளைப் பேணினார் என்பதும் ஆவணங்கள் மூலம் உறுதியாகியுள்ளது.

பாதுகாப்புத் தரப்பின் நிலைப்பாடு

இந்த ஆவணங்களின்படி, எப்ஸ்டீனோ அல்லது ஜூலியன் லீஸோ இலங்கைக்குள் எவ்விதமான சட்டவிரோத அல்லது குற்றச் செயல்களில் ஈடுபட்டதற்கான ஆதாரங்கள் இல்லை. இது தொடர்பாக இலங்கை பாதுகாப்புத் தரப்பினருக்கும் இதுவரை எவ்வித தகவல்களும் கிடைக்கவில்லை என்பது குறிப்பிடத்தக்கது.