ஆமி உபுல் கொலை சம்பவத்தின் துப்பாக்கிதாரி கைது

கணேமுல்ல சஞ்சீவவின் நெருங்கிய உதவியாளர்களில் ஒருவரான ஆமி உபுல், ராகம பட்டுவத்த பகுதியில் சுட்டுக்கொல்லப்பட்ட சம்பவம் தொடர்பில் பல முக்கிய தகவல்களை பொலிஸார் வெளிப்படுத்தியுள்ளனர்.

கடந்த ஆண்டு ஜூலை 3ஆம் திகதி, முச்சக்கரவண்டியில் வந்த இருவர் கைத்துப்பாக்கியால் இவரைச் சுட்டுவிட்டு தப்பிச் சென்றிருந்தனர்.

இச்சம்பவம் குறித்து பேலியகொட குற்றத்தடுப்புப் பிரிவினர் நடத்திய விசாரணையில், கடந்த 17ஆம் திகதி துப்பாக்கிச் சூடு நடத்திய சந்தேகநபர் ஒருவர் கைது செய்யப்பட்டார்.

தொடர்ந்து முன்னெடுக்கப்பட்ட விசாரணைகளின் அடிப்படையில், குறித்த துப்பாக்கிதாரிக்கு போக்குவரத்து வசதிகளை வழங்கிய மற்றும் அதற்கு உதவிய மற்றுமொரு சந்தேகநபர் கடந்த 18ஆம் திகதி மாதம்பை பகுதியில் வைத்து கைது செய்யப்பட்டார்.

இவர் மாதம்பே பகுதியைச் சேர்ந்த 29 வயதுடையவர் ஆவார்.

இந்தச் சந்தேகநபரிடம் நடத்தப்பட்ட விசாரணையில், கடந்த மார்ச் 7ஆம் திகதி ஜா-எல பகுதியில் உள்ள வீடொன்றின் மீது துப்பாக்கிச் சூடு நடத்திய சம்பவத்திற்கும் அவர் உடந்தையாக இருந்தது தெரியவந்துள்ளது.

அதன்படி, அவரது வீட்டில் மறைத்து வைக்கப்பட்டிருந்த போரா 12 ரக துப்பாக்கி ஒன்று, 14 தோட்டாக்கள் மற்றும் போலி இலக்கத் தகடுகளைக் கொண்ட மோட்டார் சைக்கிள் என்பன பொலிஸாரால் கைப்பற்றப்பட்டுள்ளன.

மேலதிக விசாரணைகளின் போது, ஆமி உபுல் கொலைக்கு உதவிய மற்றுமொரு சந்தேகநபர் நேற்று (19) வெள்ளம்பிட்டிய பகுதியில் வைத்து கைது செய்யப்பட்டார்.

இவர் வெள்ளம்பிட்டிய பகுதியைச் சேர்ந்த 35 வயதுடையவர் ஆவார்.

கைது செய்யப்பட்ட இந்த இரு சந்தேகநபர்களும், கடந்த ஆண்டு ஜூலை 14ஆம் திகதி மாதம்பை பகுதியில் நபரொருவர் மீது வாள் வீச்சு தாக்குதல் நடத்தி பலத்த காயம் ஏற்படுத்திய குற்றச்சாட்டுடனும் தொடர்புடையவர்கள் என தெரியவந்துள்ளது.

கைது செய்யப்பட்ட சந்தேகநபர்கள் ராகம பொலிஸ் நிலையத்தில் ஒப்படைக்கப்பட்டுள்ளதோடு, மேலதிக விசாரணைகளை ராகம பொலிஸார் முன்னெடுத்து வருகின்றனர்.