தமிழ் திரையுலகின் மூத்த பின்னணிப் பாடகரும், ‘பொற்காலம்’ திரைப்படத்தின் மூலம் பெரும் புகழ்பெற்றவருமான கிருஷ்ணராஜ் (75), உடல்நலக்குறைவு காரணமாக சென்னையில் காலமானார்.
இவரது மறைவு தமிழ் இசை உலகினரிடையே பெரும் சோகத்தை ஏற்படுத்தியுள்ளது.
பாடகர் கிருஷ்ணராஜ், இசையமைப்பாளர் தேவாவின் இசையில் பல பிரபலமான பாடல்களைப் பாடியுள்ளார்.
குறிப்பாக, ‘நலம் நலமறிய ஆவல்’, ‘வெள்ளரிக்கா பிஞ்சு வெள்ளரிக்கா’, ‘காத்தடிக்குது’ மற்றும் ‘சூரரைப் போற்று’ திரைப்படத்தில் இடம்பெற்ற ‘நாலு நிமிஷம்’ உள்ளிட்ட 300க்கும் மேற்பட்ட பாடல்களைப் பாடி ரசிகர்களின் மனதில் இடம்பிடித்துள்ளார்.
குறிப்பாக, ‘பொற்காலம்’ திரைப்படத்தில் இடம்பெற்ற ‘தஞ்சாவூரு மண்ண எடுத்து’ பாடல் இவருக்கு பெரும் புகழைப் பெற்றுத் தந்தது. இந்தப் பாடல் இன்றளவும் இரசிகர்களால் நினைவுகூரப்படும் பாடல்களில் ஒன்றாகத் திகழ்கிறது.
தனது தனித்துவமான குரலாலும், இனிமையான பாடல்களாலும் தமிழ் ரசிகர்களிடையே தனி இடம்பிடித்த கிருஷ்ணராஜின் மறைவு, திரையுலகிற்கும் இசை இரசிகர்களுக்கும் பேரிழப்பாகக் கருதப்படுகிறது.
