கலா ஓயாவின் நீர்ப்பிடிப்புப் பகுதிகளின் மேல் மற்றும் மத்திய பகுதிகளில் பெய்து வரும் கனமழை காரணமாக, கலா ஓயாவின் நீர்மட்டம் வெள்ள அபாய நிலையை அண்மித்துள்ளதாக அறிவிக்கப்பட்டுள்ளது.
இதன் காரணமாக, இராஜாங்கனை நீர்த்தேக்கத்தின் வான் கதவுகள் திறக்கப்பட்டுள்ளதுடன், விநாடிக்கு 13,200 கன அடிக்கும் அதிகமான நீர் கலா ஓயாவில் வெளியேற்றப்பட்டு வருகின்றது.
நீர்த்தேக்கத்திற்குக் கிடைக்கும் நீர்வரத்தைப் பொறுத்து, எதிர்வரும் சில மணித்தியாலங்களில் நீர் வெளியேற்றத்தின் அளவு மேலும் அதிகரிக்கக்கூடும் எனத் தெரிவிக்கப்பட்டுள்ளது.
இதனால், இராஜாங்கனை, நொச்சியாகம, வனாத்தவில்லுவ மற்றும் கருவலகஸ்வெவ ஆகிய பிரதேச செயலாளர் பிரிவுகளுக்கு உட்பட்ட கலா ஓயாவின் தாழ்நிலப் பகுதிகளில் வெள்ளப்பெருக்கு ஏற்படும் அபாயம் காணப்படுகின்றது.
எனவே, குறித்த பகுதிகளில் வசிக்கும் பொதுமக்கள் மிகுந்த அவதானத்துடன் செயற்படுமாறும், கலா ஓயா ஊடாகவும் அதனை அண்மித்த பகுதிகளிலும் பயணிக்கும் சாரதிகள் மற்றும் பயணிகள் எச்சரிக்கையுடன் இருக்குமாறும் அறிவுறுத்தப்பட்டுள்ளனர்.
மேலும், நிலைமையைத் தொடர்ந்து அவதானித்து, வெள்ள அபாயத்தை எதிர்கொள்ளத் தேவையான முன்னெச்சரிக்கை நடவடிக்கைகளை மேற்கொள்ளுமாறு அனர்த்த முகாமைத்துவ அதிகாரிகளும் கேட்டுக்கொள்ளப்பட்டுள்ளனர்.
முக்கிய அறிவுறுத்தல் : வெள்ள அபாயம் உள்ள தாழ்நிலப் பகுதிகளில் வசிப்பவர்கள் அதிகாரிகளின் அறிவுறுத்தல்களைப் பின்பற்றி, பாதுகாப்பு நடவடிக்கைகளை மேற்கொள்ள வேண்டும் எனவும் அறிவுறுத்தப்படுகின்றனர்.
