10 ஆவது ஐசிசி (ICC) ஆடவர் டி20 உலகக் கிண்ணக் கிரிக்கெட் தொடரின் தொடக்க ஆட்டத்தில், நெதர்லாந்து அணியை 3 விக்கெட்டுகள் வித்தியாசத்தில் வீழ்த்தி பாகிஸ்தான் அணி தனது முதல் வெற்றியைப் பதிவு செய்துள்ளது.
கொழும்பு எஸ்.எஸ்.சி (SSC) மைதானத்தில் இன்று (07) நடைபெற்ற இந்தப் போட்டியில் நாணய சுழற்சியில் வெற்றி பெற்ற பாகிஸ்தான் அணி முதலில் களத்தடுப்பைத் தேர்வு செய்தது.
பாகிஸ்தான் பந்துவீச்சாளர்களின் துல்லியமான பந்துவீச்சினால் நெதர்லாந்து அணி 19.5 ஓவர்களில் அனைத்து விக்கெட்டுகளையும் இழந்து 147 ஓட்டங்களை மாத்திரமே பெற்றது.
நெதர்லாந்து தரப்பில்:
அணித்தலைவர் ஸ்கொட் எட்வர்ட்ஸ் 29 பந்துகளில் 37 ஓட்டங்களையும், பாஸ் டி லீட் 30 ஓட்டங்களையும் பெற்றனர்.
ஆரம்பத் துடுப்பாட்ட வீரர் மைக்கேல் லெவிட் அதிரடியாக விளையாடி 15 பந்துகளில் 24 ஓட்டங்களைப் பெற்றுக்கொடுத்தார்.
பாகிஸ்தானின் போராட்டமான வெற்றி
148 ஓட்டங்கள் என்ற சவாலான இலக்கை நோக்கிப் பதிலுக்குத் துடுப்பெடுத்தாடிய பாகிஸ்தான் அணிக்கு நெதர்லாந்து பந்துவீச்சாளர்கள் கடும் சவாலை அளித்தனர். எனினும், நிதானமாக விளையாடிய பாகிஸ்தான் அணி 19.3 ஓவர்களில் 7 விக்கெட்டுகளை இழந்து 148 ஓட்டங்களைப் பெற்று வெற்றியை உறுதி செய்தது.
இதன் மூலம் 3 விக்கெட்டுகள் வித்தியாசத்தில் வெற்றி பெற்ற பாகிஸ்தான் அணி, 2026 ஆம் ஆண்டு உலகக் கிண்ணத் தொடரின் முதல் வெற்றியைத் தனது கணக்கில் பதிவு செய்துள்ளது.
