இலங்கையில் நிலவும் மழையுடனான வானிலை எதிர்வரும் நாட்களில் மேலும் வலுவடையக்கூடும் என வளிமண்டலவியல் திணைக்களம் எதிர்வு கூறியுள்ளது.
இலங்கைக்கு அருகில் நிலவிய குறைந்த காற்றழுத்தப் பகுதி மேலும் வலுவடைந்து குறைந்த காற்றழுத்தத் பகுதியாக உருவாகியுள்ள நிலையில், அதன் தாக்கத்தால் இன்று (22) நாடு முழுவதும் மழை அதிகரிக்கக்கூடும் என எதிர்பார்க்கப்படுகிறது.
அத்துடன், இலங்கையைச் சூழவுள்ள ஆழ்கடல் மற்றும் ஆழமற்ற கடல் பகுதிகளிலும் மழை அதிகரிக்கக்கூடும் என அறிவிக்கப்பட்டுள்ளது.
எனவே, வளிமண்டலவியல் திணைக்களத்தினால் வெளியிடப்படும் எதிர்வரும் முன்னறிவிப்புகள் மற்றும் எச்சரிக்கைகளைத் தொடர்ந்து அவதானிக்குமாறு பொதுமக்கள், மீனவர்கள் மற்றும் கடல்சார் சமூகத்தினரிடம் கேட்டுக்கொள்ளப்பட்டுள்ளது.
மாகாண ரீதியான மழை முன்னறிவிப்பு :
மேல், சபரகமுவ, மத்திய, வடக்கு, வடமேல் மற்றும் தென் மாகாணங்களிலும் மன்னார் மாவட்டத்திலும் அவ்வப்போது மழை அல்லது இடியுடன் கூடிய மழை பெய்யக்கூடும். இந்தப் பகுதிகளில் வானம் பெரும்பாலும் மேகமூட்டத்துடன் காணப்படும்.
நாட்டின் ஏனைய பகுதிகளில் பிற்பகல் 1 மணிக்குப் பின்னர் மழை அல்லது இடியுடன் கூடிய மழை பெய்யக்கூடும் என எதிர்பார்க்கப்படுகிறது.
100 மி.மீ.க்கு மேல் கனமழை பெய்யும் சாத்தியம் :
மேல், சபரகமுவ, தென் மற்றும் வடமேல் மாகாணங்களின் சில இடங்களில் 100 மில்லிமீற்றருக்கும் அதிகமான பலத்த மழை பெய்யக்கூடும் என எதிர்வுகூறப்பட்டுள்ளது.
பொதுமக்களுக்கு எச்சரிக்கை :
இடியுடன் கூடிய மழை பெய்யும் சந்தர்ப்பங்களில் தற்காலிகமாகப் பலத்த காற்று வீசக்கூடும் என்பதுடன், மின்னல் தாக்கங்களும் ஏற்படலாம்.
எனவே, இத்தகைய அபாயங்களிலிருந்து பாதுகாத்துக்கொள்ளத் தேவையான முன்னெச்சரிக்கை நடவடிக்கைகளை மேற்கொள்ளுமாறு பொதுமக்கள் அறிவுறுத்தப்பட்டுள்ளனர்.
மீனவர்களும் கடல்சார் நடவடிக்கைகளில் ஈடுபடுவோரும் வானிலை அறிவிப்புகளைப் பின்பற்றி அவதானத்துடன் செயற்படுமாறு கேட்டுக்கொள்ளப்படுகிறார்கள்.
