இலங்கையில் நாடாளுமன்ற உறுப்பினர்களுக்கான ஓய்வூதிய முறையை முழுமையாக இரத்து செய்வதற்கான “நாடாளுமன்ற ஓய்வூதியங்கள் (நீக்குதல்) சட்டமூலம்” எதிர்வரும் பெப்ரவரி 17 ஆம் திகதி நாடாளுமன்றத்தில் விவாதத்திற்கு எடுத்துக்கொள்ளப்படவுள்ளது.
நாடாளுமன்ற விவகாரங்கள் பற்றிய குழுவின் தீர்மானத்தின்படி, அன்றைய தினமே இந்த சட்டமூலத்தை விவாதித்து நிறைவேற்ற நடவடிக்கை எடுக்கப்படும் என சபை முதல்வர் அமைச்சர் பிமல் ரத்நாயக்க தெரிவித்துள்ளார்.
சட்டமூலத்தின் முக்கிய அம்சங்கள்:
ஓய்வூதிய ஒழிப்பு: 1977 ஆம் ஆண்டின் 1 ஆம் இலக்க நாடாளுமன்ற ஓய்வூதியச் சட்டத்தை இந்த புதிய சட்டமூலம் முழுமையாக நீக்க வழிவகை செய்கிறது.
அனைவருக்கும் பொருந்தும்: இச்சட்டம் நடைமுறைக்கு வரும் திகதி முதல், தற்போது ஓய்வூதியம் பெற்று வருபவர்களுக்கும் இனி ஓய்வூதியத்திற்குத் தகுதி பெறுபவர்களுக்கும் இது பொருந்தும் என எதிர்பார்க்கப்படுகிறது.
அரசியல் மாற்றம்: அரசியலை ஒரு இலாபகரமான தொழிலாகப் பார்ப்பதைத் தடுத்து, மக்கள் சேவையை ஊக்குவிக்கும் நோக்கில் தற்போதைய அரசினால் இந்த நடவடிக்கை முன்னெடுக்கப்பட்டுள்ளது.
